انت هنا : الرئيسية » الشعر » الشاعر سالم حمد : احب القصيد ولا اكتب لخاطر الجمهور

الشاعر سالم حمد : احب القصيد ولا اكتب لخاطر الجمهور

تراودني افكار وجمل واختلاط شعور
بعد شحّ طول الخيط وانعاجت الابره

فيا ربي ألجمني قبل نطق فاهي زور
و لا تتّخذ منّي لهدي البشر عبره

احب القصيد ولا اكتب لخاطر الجمهور
بسيط . وعلى فالي . ولي بالزمن خبره

ياكم ( اميّ ) اولى بالشهاده من ( الدكتور )
وياكم من( صغيَر ) سن بالعقل ( يا كبره)

اغنّي . وانا مانيب رايق . ولا مسرور
تمرّ التجارب كل عاقل وتختبره

تعلمت اشياء ما ابيها لكن مجبور
حداني عليها الوقت .او قلّة الدبره

تعلمت اجامل ناس تآقف مع الحنجور
على شان خاطر ناس واغّير النبره

لكني نظيف احساس . مااعيش في هالدّور
ومثل ماخبرني (الصدق ) باقي على خبره

رحاة السنين تدور . وتدور . ثم تدور
و وجه الزمان يدور . ويواجهك دبره

ابو كفّ ما يقدر بكفّه يغط النور
وابو شبر من دون الحقيقه قصر شبره

رفيق الحَسَد.. عن كل كلمة قفى مشكور
( مسامِحْك ) كلِ له ذنوبه . وله قبره

يكفّي عليك من الحمل( كبدك الممرور )
وعلى حملك ( انت براسك ) .القاع يا صبره

مع ان ( التسامح ) للاسف له كذا منظور
( عفا الله عنك ) وكيف تعتبره إعتبره

سالم حمد الملعبي

جميع الحقوق محفوظة لـ "جريدة العوازم الإخبارية الموقع الرسمي "

الصعود لأعلى